2025 წლის ბოლოსთვის, თბილისში უძრავი ქონება გაძვირდა – საქსტატი

2025 წლის ბოლოსთვის, თბილისში უძრავი ქონება წლიურად და თვის ჭრილში გაძვირდა – ამის შესახებ საქსტატის მიერ გამოქვეყნებული საცხოვრებელი უძრავი ქონების ფასების IV კვარტალის ინდექსიდან ირკვევა.

2025 წლის IV კვარტალში, წინა კვარტალთან შედარებით საცხოვრებელი უძრავი ქონების ფასების ინდექსი (RPPI) 1.5%-ით გაიზარდა, ხოლო ინდექსის წლიურმა ზრდამ 3.3% შეადგინა.

2020 წლის საშუალოსთან შედარებით ინდექსი 59.4%-ით არის გაზრდილი. RPPI-ის დაფარვა შემოიფარგლება ქ. თბილისით და მოიცავს მხოლოდ ახალი საცხოვრებელი უძრავი ქონების ბაზარს, როგორც მრავალსართულიანი სახლების (ბინების), ისე კერძო სახლების სეგმენტებს.

ამ პერიოდში, წინა კვარტალთან შედარებით, ფასები როგორც საცხოვრებელი ბინების სეგმენტში (1.3%), ისე კერძო სახლების სეგმენტში (2.1%) გაიზარდა. 2024 წლის IV კვარტალთან შედარებით ფასების ზრდა დაფიქსირდა ორივე სეგმენტში – ბინებზე 3.5%-ით, ხოლო კერძო სახლებზე 2.5%-ით.