გლობალურად ჰესების დადგმული სიმძლავრე 13.7 გგვტ-ით გაიზარდა – სადაა საქართველო მსოფლიო რეიტინგში?

საერთაშორისო ჰიდროენერგეტიკულმა ასოციაციამ (IHA) ყოველწლიური ანგარიში გამოაქვეყნა, რომელშიც აღნიშნულია, რომ 2023 წელს მსოფლიოში დადგმული სიმძლავრე 1,416 გგვტ-მდე გაიზარდა.

გასულ წელს ჰიდროენერგეტიკული სიმძლავრე 7.2 გგვტ-ით გაიზარდა და 1,237 გიგავატს მიაღწია, ხოლო ახალი ჰიდრომააკუმულირებელი სადგურების დადგმული სიმძლავრე 6.5 გგვტ-ით, 179 გიგავატამდე გაიზარდა.

IHA-ს ანგარიშის თანახმად, გენერაციის ახალი სიმძლავრეების მიხედვით, საქართველო 54 ქვეყანას შორის 37-ე ადგილზეა. გასულ წელს საქართველოში მხოლოდ 6 მცირე ჰესი შევიდა ექსპლუატაციაში, რომელთა ჯამური დადგმული სიმძლავრეც 9 მგვტ-მდე იყო. აღსანიშნავია, რომ რეიტინგში 49 მგვტ ახალი სიმძლავრით 29-ე ადგილზეა მეზობელი სომხეთი. კიდევ უფრო კარგი შედეგი აქვს აზერბაიჯანს და 147 მგვტ ახალი გენერაციით მე-17 ადგილზეა. გლობალური რეიტინგის სათავეში, 6,749 მგვტ ახალი დადგმული სიმძლავრით, კვლავ ჩინეთია.