დევნილი უკრაინელი ოჯახების 300 ლარიანი დახმარებების ვადა 1 ოქტომბრამდე გახანგრძლივდა

საქართველოს მთავრობამ კიდევ ერთხელ, ამჯერად 2025 წლის 1 ოქტომბრამდე გაახანგრძლივა უკრაინიდან დევნილი ოჯახების 300-ლარიანი დახმარების და ოჯახის წევრებზე თვეში 45 ლარის სოციალური შემწეობების გაცემა – ამას ითვალისწინებს “ოცნების” მთავრობის 4 ივლისის განკარგულება, რომელიც დღეს გამოქვეყნდა.

ამ სოციალურ დახმარებას მთავრობა 2022 წლის 13 ივლისიდან გასცემს და ის რეგულარულად ხანგრძლივდება.

ფინანსთა სამინისტროს თანახმად, ყოველთვიურად ამ დახმარებაზე დაახლოებით 900,000-950,000 ლარი იხარჯება.

„უკრაინაში მიმდინარე საომარი მოქმედებების გამო საქართველოში შემოსული უკრაინის მოქალაქეთა და უკრაინაში მუდმივი ცხოვრების უფლების მქონე პირთათვის სოციალურ-ეკონომიკური მხარდაჭერის ღონისძიებების შესახებ“ საქართველოს მთავრობის 2022 წლის 13 ივლისის N1254 განკარგულების შესაბამისად სსიპ – სოციალური მომსახურების სააგენტო ახორციელებდა დახმარების გაცემას ოჯახზე თვეში 300 ლარის ოდენობით, ხოლო საარსებო პირობების უზრუნველსაყოფად – პირზე 45 ლარის ოდენობით. ამ მიზნით იანვარში დახმარება გაეწია 2 400 ოჯახს (4 330 პირს), თებერვალში – 2 556 ოჯახს (4 578 პირს), მარტში – 2 487 ოჯახს (4 461 პირს),”- ნათქვამია 2025 წლის პირველი კვარტალის ბიუჯეტის შესრულების ანგარიშში.

შესაბამისად, ამ დახმარების წლიური ხარჯი დაახლოებით 10-11 მილიონი ლარის ფარგლებში მერყეობს და ის ქვეყანაში მუდმივად მყოფი უკრაინელი დევნილების რაოდენობაზე არის დამოკიდებული.