ივლისში ყველაზე მეტად თევზეული გაძვირდა – საქსტატი

სტატისტიკის ეროვნული სამსახურის მონაცემებით, წლიური ინფლაციის ფორმირებაზე ძირითადი გავლენა იქონია ფასების ცვლილებამ სურსათსა და უალკოჰოლო სასმელებზე. ჯგუფში ფასები გაიზარდა 4.9 პროცენტით, რაც წლიურ ინფლაციაზე 1.74 პროცენტული პუნქტით აისახა.

თევზეული 18.2 პროცენტით, ხორცი და ხორცის პროდუქტები 9.2 პროცენტით, პური და პურპროდუქტები 8.1 პროცენტით, ზეთი და ცხიმი 7.6 პროცენტით, ყავა, ჩაი და კაკაო 6.4 პროცენტითაა გაძვირებული, რძე, ყველი და კვერცხი – 4.2 პროცენტით. ხილსა და ყურძენზე ფასებმა 2.5 პროცენტით მოიმატა. შაქარი, ჯემი და სხვა ტკბილეული 1.7 პროცენტით გაძვირდა, მინერალური და წყაროს წყალი, უალკოჰოლო სასმელები და ნატურალური წვენები – 1.5 პროცენტით. ამასთან, ფასების 5.7-პროცენტიანი კლება დაფიქსირდა ბოსტნეულსა და ბაღჩეულზე.

ამასთან, ტრანსპორტის ჯგუფში ფასები გაიზარდა 14.2 პროცენტით, რაც წლიურ ინფლაციაზე 1.66 პროცენტული პუნქტით აისახა. ფასები მომატებულია პირადი სატრანსპორტო საშუალებების ექსპლუატაციასა (20.1 პროცენტი) და სატრანსპორტო მომსახურებაზე (10.8 პროცენტი);