ნებისმიერი სანქცია ბიზნესგარემოსთვის კატასტროფულად დამაზიანებელია – ზვიად ჭუმბურიძე

ევროკავშირი-საქართველოს ბიზნესსაბჭოს გენერალური მდივანი, ზვიად ჭუმბურიძე მედიასთან აცხადებს, რომ ნებისმიერი სანქცია, თუნდაც ეს იყოს მსუბუქი, ბიზნესგარემოსთვის კატასტროფულად დამაზიანებელია. ამის შესახებ მან ევროკავშირი-საქართველოს ბიზნესსაბჭოს (EUGBC) ორგანიზებითა და USAID EGP-ის მხარდაჭერით გამართულ შავი ზღვის ყოველწლიურ კონფერენციაზე ჟურნალისტებთან ისაუბრა.

მისივე შეფასებით, ინვესტორს სტაბილური გარემო სჭირდება, თუმცა არცერთი ინვესტორი, რომელიც გრძელვადიან ინვესტირებას გეგმავს, არასტაბილურ გარემოში ინვესტიციას არ ჩადებს.

„ინვესტორს ქვეყანაში მდგრადი ვითარება სჭირდება. არცერთი ინვესტორი, რომელიც გრძელვადიან ინვესტიციის ჩადებას და განვითარებას აპირებს, ამაზე არ წავა, როდესაც ხედავს, რომ ქვეყანაში არ არის პოლიტიკური სტაბილურობა. ბიზნეს კლიმატი ძალიან მყიფეა და ჩვენ ამ გზაზე გავდივართ.

თუ ხელისუფლება გადაწყვეტილებას არ მიიღებს და ამ სტატუს-კვოთი დავრჩებით, რომ ხალხი მოითხოვს ხელახალ არჩევნებს და ხელისუფლება წინააღმდეგია, ეს არცერთ მხარეს სიკეთეს არ მოუტანს. ამიტომ, ახალ არჩევნებს ახალი საარჩევნო კოდექსით და კომისიით, ამას ალტერნატივა არ აქვს. თუ გვინდა, რომ ეს ქვეყანა გამოვიყვანოთ მდგომარეობიდან და არ იყოს ყველაფერი კითხვის ნიშნის ქვეშ, აუცილებელია რომ ეს გააკეთოს დე ფაქტო ხელისუფლებამ.

როდესაც შენი ხელისუფლების წარმომადგენლები არიან დასანქცირებული, ქვეყნის იმიჯი არის პრაქტიკულად 0-თან გათანაბრებული. არ აქვს მნიშვნელობა ეს იქნება მაგნიცკის აქტის მიხედვით დასანქცირება თუ უფრო მსუბუქი სანქციით. ნებისმიერი სანქცია, მსუბუქი სანქციაც კი ბიზნეს გარემოსთვის და ბიზნეს კლიმატისთვის არის კატასტროფულად დამაზიანებელი“, – ამბობს ზვიად ჭუმბურიძე.

ბიემჯი