სად აშენდება ახალი სტადიონი – მთავრობამ 755 000 ევროდ კონსულტანტები დაიქირავა

თბილისში 70,000-ადგილიანი ახალი სტადიონის მშენებლობა იგეგმება, თუმცა პროექტის დეტალები ჯერ კიდევ უცნობია. საქართველოს მთავრობამ ჰოლანდიური კომპანია The Stadium Consultancy B.V. 755,000 ევროდ დაიქირავა, რათა შეისწავლოს, სად შეიძლება აშენდეს სტადიონი და მოამზადოს პროექტის კონცეფცია.

კომპანიას დაევალა ტენდერის დოკუმენტაციის მომზადება და სამშენებლო პირობების განსაზღვრა. ამ ეტაპზე უცნობია, რა დაუჯდება გადასახადის გადამხდელებს სტადიონის მშენებლობა, თუმცა საერთაშორისო პრაქტიკის მიხედვით, ასეთი ობიექტები 100-200 მილიონ დოლარსაც აღემატება. სტადიონი ხელსაყრელი უნდა იყოს როგორც საფეხბურთო ასევე რაგბის მატჩების მასპინძლობისთვის.

იანვარში ქართული ოცნების პრემიერ-მინისტრმა ირაკლი კობახიძემ განაცხადა, რომ სტადიონის მშენებლობა 2026 წლის აპრილში უნდა დაიწყოს, ხოლო დასრულება 2028 წლისთვის იგეგმება. საბოლოო ლოკაცია ჯერ არ არის განსაზღვრული. მთავრობა აეროპორტისა და რუსთავის მიმართულებებს განიხილავს, ხოლო საბოლოო გადაწყვეტილებას კონსულტანტის დასკვნის საფუძველზე მიიღებს.

ხელშეკრულების თანახმად, The Stadium Consultancy B.V. პროექტის ზედამხედველობას 2029 წლის აპრილამდე განაგრძობს. მთავრობა იმედოვნებს, რომ ახალი სტადიონი ჩემპიონთა ლიგის ფინალის მასპინძლობისთვის შესაბამისი იქნება.

ბიემჯი