საქართველოში საშუალო ხელფასი ₾2,212-მდე გაიზარდა – საქსტატი

2025 წლის II კვარტალში საქართველოში საშუალო ხელფასი 2,212 ლარამდე გაიზარდა – რაც წინა წლის ანალოგიურ პერიოდთან შედარებით 10.3%-ით მეტია.

ეს თანხა საშემოსავლო გადასახადის 20%-ის გამოკლებით ხელზე 1770 ლარს ნიშნავს. შესაბამისად, საქსტატის თანახმად, საქართველოში საშემოსავლო გადასახადის გამოკლებით საშუალო ხელფასი 1770 ლარია.

“2025 წლის II კვარტალში ქალების საშუალო ხელფასი 1 769.5 ლარი, ხოლო კაცების – 2 655.8 ლარი იყო. ხელფასების წლიურმა ზრდამ ქალებში 179.3 ლარი (11.3%) შეადგინა, ხოლო კაცებში – 242.3 ლარი (10.0%). საქმიანობის სახეების მიხედვით კაცების ხელფასი თითქმის ყველა სექტორში აღემატებოდა ქალების ხელფასს,”- ნათქვამია საქსტატის ანგარიშში.

საქმიანობის სახეების მიხედვით, შედარებით მაღალი ხელფასი დაფიქსირდა შემდეგ დარგებში:

• ინფორმაცია და კომუნიკაცია – 4 176.5 ლარი (წინა წლის შესაბამის პერიოდთან შედარებით გაიზარდა 5.4 პროცენტით);
• საფინანსო და სადაზღვევო საქმიანობები – 3 732.2 ლარი (გაიზარდა 2.5 პროცენტით);
• მშენებლობა – 3 467.7 ლარი (გაიზარდა 17.7 პროცენტით);
• პროფესიული, სამეცნიერო და ტექნიკური საქმიანობები – 2 995.3 ლარი (გაიზარდა 4.3 პროცენტით).

რეგიონების მიხედვით, ყველაზე მაღალი – 2,553 ლარის ხელფასი თბილისშია, ხოლო ყველაზე დაბალი კი რაჭა-ლეჩხუმსა და ქვემო სვანეთში – 1,122 ლარის ოდენობით.