7 თვეში იმპორტი $10.3 მილიარდამდე გაიზარდა, მხოლოდ ივლისში კი შემცირდა – TOP იმპორტიორი ქვეყნები/საქონელი

საქართველოს $14 მილიარდიან სავაჭრო ბრუნვაში იანვარ-ივლისში იმპორტზე 72.8% მოდიოდა. 7 თვის ვაჭრობის სტატისტიკის მიხედვით, იმპორტდამოკიდებული ქვეყნიდან სხვადასხვა საქონლის შესაძენად 10 მილიარდ 310 მილიონი დოლარი გავიდა, რაც წლიურად 10.8%-ით გაზრდილი მაჩვენებელია. თუმცა სტატისტიკიდან ვიგებთ იმასაც, რომ ექსპორტის მსგავსად, მხოლოდ ივლისის თვეში იმპორტი 6.6%-ით, 1 მილიარდ 464 მილიონ დოლარამდე შემცირდა.

ოფიციალური სტატისტიკის მიხედვით, იანვარ-ივლისში 10 უმსხვილესი საიმპორტო პარტნიორი ქვეყნის წილმა საქართველოს მთლიან იმპორტში 71.6% დაიკავა. ამასთან, აშშ-დან იმპორტის ზრდა ავტომობილების იმპორტის გაზრდილ მაჩვენებელს უკავშირდება. წლის ამ პერიოდში იმპორტი გერმანიიდან და იაპონიიდან შემცირდა.

TOP-10 იმპორტიორი ქვეყანა:

1. თურქეთი – $1.5 მლრდ, ზრდა – 2.2%;
2. აშშ – $1.5 მლრდ, ზრდა – 39.5%;
3. რუსეთი – $1 მლრდ, ზრდა – 6.5%;
4. ჩინეთი – $1 მლრდ, ზრდა – 20.5%;
5. გერმანია – $683 მლნ, კლება – 4.7%;
6. გაერთიანებული სამეფო – $448.5 მლნ, ზრდა – 425%;
7. აზერბაიჯანი – $332 მლნ, ზრდა – 2.2%;
8. იტალია – $247 მლნ, ზრდა – 5.1%;
9. იაპონია – $225.9 მლნ, კლება – 27%;
10. საფრანგეთი – $187.6 მლნ, ზრდა – 6.9%;

უმსხვილესი საიმპორტო სასაქონლო ჯგუფი 2025 წლის იანვარ-ივლისში მსუბუქი ავტომობილების სახით იყო წარმოდგენილი, რომლის იმპორტმა 2 მილიარდ 58 მლნ დოლარი და მთელი იმპორტის 20% შეადგინა. იმპორტის კუთხით შემცირებულია ნავთობროდუქტების, სატვირთოებისა და გამომთვლელი მანქანების შემოტანა.

იმპორტირებული საქონლის TOP-10-ეული ასეთია:

1. მსუბუქი ავტომობილები – $2 მლრდ, ზრდა – 9.5%;
2. ნავთობი და ნავთობპროდუქტები – $727.5 მლნ, კლება – 5.6%;
3. სურათები, ნახატები – $481 მლნ, ზრდა – 244 469%;
4. სამკურნალო საშუალებები დაფასოებული – $398 მლნ, ზრდა – 7.7%;
5. ნავთობის აირები – $258 მლნ, ზრდა – 8.3%;
6. სატელეფონო აპარატები – $176.2 მლნ, ზრდა – 1.9%;
7. სატვირთო ავტომობილები – $99.9 მლნ, კლება – 17.8%;
8. სიგარები, სიგარილები – $92.7 მლნ, ზრდა – 2.8%;
9. წნელები ნახშირბადიანი ფოლადისაგან – $91.2 მლნ, ზრდა – 5.7%;
10. გამომთვლელი მანქანები და მათი ბლოკები – $89.6 მლნ, კლება – 53.8%.