საპატრიარქოში სინოდის სხდომა მიმდინარეობს

საპატრიარქო ტახტის მოსაყდრის, მეუფე შიოს მოწვევით, საპატრიარქოში სინოდის სხდომა იმართება.

საპატრიარქოს საზოგადოებასთან ურთიერთობის სამსახურის ინფორმაციით, სხდომის მიზანია იმ საორგანიზაციო თემების განხილვა, რომლებიც საქართველოს მართლმადიდებელი ეკლესიის მართვა-გამგეობის დებულებით არ არის გაწერილი.

„მათ შორის, სინოდის შემდგომ სხდომებსა და გაფართოებულ კრებასთან დაკავშირებული დამატებითი დეტალები, კრების გამართვის ადგილი, დელეგატების მოწვევის პროცედურა და სხვა აუცილებელი საკითხები“, – აღნიშნულია ინფორმაციაში.

ამასთან, როგორც საპატრიარქოს საზოგადოებასთან ურთიერთობის სამსახურის ხელმძღვანელმა, ანდია ჯაღმაიძემ სინოდის სხდომის დაწყებამდე ჟურნალისტებს განუცხადა, დღევანდელი სხდომა არ არის გათვალისწინებული პატრიარქობის სამი კანდიდატის გამოსარჩევად, ის პროცესუალური საკითხების მოწესრიგებას დაეთმობა.