სპორტსმენები, ვინც ზამთრის ოლიმპიურ თამაშებზე ასპარეზობის უფლება მოიპოვა, 50 000 ლარს მიიღებენ – ირაკლი კობახიძე

მთავრობის გადაწყვეტილებით, ზამთრის ოლიმპიურ თამაშებში მონაწილე თითოეულ სპორტსმენს, ოლიმპიური ლიცენზიის მოპოვებისთვის, ფულადი ჯილდო გადაეცემა.

ამის შესახებ ირაკლი კობახიძემ ფიგურულ მოციგურავეთა და ფედერაციის წარმომადგენელთა დაჯილდოების ცერემონიაზე განაცხადა.

მისი თქმით, სახელმწიფო აფასებს იმ ძალისხმევას, რაც ოლიმპიური საგზურის მოპოვების მიღმა დგას.

როგორც ირაკლი კობახიძემ აღნიშნა, დაწესებულია კონკრეტული ფულადი პრიზები როგორც ლიცენზიის მოპოვებისთვის, ისე საპრიზო ადგილების დაკავებისთვის:

• ოლიმპიური ლიცენზიისთვის: თითოეული სპორტსმენი, ვინც ზამთრის ოლიმპიურ თამაშებზე ასპარეზობის უფლება მოიპოვა, 50 000 ლარს მიიღებს.
• ვიცე-ჩემპიონებისთვის: ლუკა ბერულავა და ანასტასია მეტელნიკა საპრიზო ადგილის დაკავებისთვის 500-500 ათასი ლარით დაჯილდოვდებიან.

„ზამთრის ოლიმპიურ თამაშებში მონაწილე თითოეულ სპორტსმენს გადაეცემა 50-50 ათასი ლარი ოლიმპიური ლიცენზიის მოპოვებისთვის და ოლიმპიურ თამაშებზე მონაწილეობისთვის“, – განაცხადა კობახიძემ.

პრემიერმა ასევე დააზუსტა, რომ იდენტური ფულადი ჯილდოები იქნება დაწესებული ზამთრის პარალიმპიური თამაშების მონაწილეებისთვისაც.

„მინდა გამოვხატო საქართველოს მთავრობის მზაობა, რომ მაქსიმუმი გააკეთოს საქართველოში სპორტის წარმატებისთვის, ამისათვის დიდი ინვესტიციები იდება და მომავალშიც ყველაფერი გაკეთდება, რათა ქართულმა სპორტმა კიდევ უფრო დიდ შედეგებს მიაღწიოს“, — აღნიშნა პრემიერ-მინისტრმა.

მისივე თქმით, გადაცემული სახელმწიფო ჯილდოები არის „მადლიერების გამოხატულება“ და ის დაფასება, რომელსაც სპორტსმენები სახელმწიფოსგან იმსახურებენ.