რას ითვალისწინებს „ფულის გათეთრების შესახებ“ კანონში ცვლილებები?

საფინანსო-საბიუჯეტო კომიტეტმა მთავრობის მიერ საკანონმდებლო წესით წარმოდგენილი კანონპროექტი „ფულის გათეთრებისა და ტერორიზმის დაფინანსების აღკვეთის ხელშეწყობის შესახებ“ საქართველოს კანონში ცვლილების შეტანის თაობაზე“ პირველი მოსმენით განიხილა და მხარი დაუჭირა პლენარულ სხდომაზე განსახილველად გატანას. 

„კანონპროექტი მიზნად ისახავს ევროპის საბჭოს ფულის გათეთრების წინააღმდეგ მიმართულ ღონისძიებათა შემფასებელ რჩეულ ექსპერტთა კომიტეტის (MONEYVAL) რეკომენდაციების გათვალისწინებას. საუბარია შეფასების მეხუთე რაუნდზე. კერძოდ, შესაბამისი ჯგუფი საქართველოში იმყოფებოდა 2019 წელს, 2020 წელს გამოქვეყნდა ანგარიში, რომელშიც საუბარი იყო, რომ გაეროს უშიშროების საბჭოს რეზოლუციების იმპლემენტაციასთან დაკავშირებით საჭიროა დამატებითი ინსტიტუციური ბერკეტების გაჩენა –  საკანონმდებლო ცვლილებების განხორციელება და შეიძლება ითქვას, რომ ცვლილებათა პროექტი ზედმიწევნით მიყვება MONEYVAL-ის რეკომენდაციებს და ასევე, რა თქმა უნდა, შესაბამისობაში მოდის ფინანსური ქმედებების სამუშაო ჯგუფის (FATF) სტანდარტებთან“, – განაცხადა იუსტიციის მინისტრის მოადგილემ თორნიკე ჭეიშვილმა კანონპროექტის წარდგენისას.

როგორც მომხსენებელმა აღნიშნა, შემოთავაზებული ცვლილება მიზნად ისახავს გაერთიანებული ერების ორგანიზაციის უშიშროების საბჭოს მიერ ტერორიზმის დაფინანსებისა და მასობრივი განადგურების იარაღის გავრცელების, დაფინანსების, გამოვლენისა და აღკვეთის მიზნით მიღებული რეზოლუციების ეროვნულ დონეზე აღსრულების მექანიზმის ხარვეზების აღმოფხვრას და არსებული საკანონმდებლო ბაზის საერთაშორისო სტანდარტებთან მაქსიმალურად დაახლოებას. 

მინისტრის მოადგილის ინფორმაციით, ცვლილებით ფინანსურ ინსტიტუტებსა და არასაფინანსო საქმიანობის განმახორციელებელ პირებს დაუწესდებათ გაეროს უშიშროების საბჭოს რეზოლუციების შესაბამისად სანქცირებული ქონების აღმოჩენისას  ფინანსური მონიტორინგის სამსახურის წინაშე ანგარიშგების ვალდებულება.  

ამასთანავე, წარმოდგენილი ცვლილებების საფუძველზე სამთავრობო კომისიას ეკისრება ყადაღისადმი დაქვემდებარებულ ქონებაზე კეთილსინდისიერ მესამე პირთა უფლებების გათვალისწინების ვალდებულება, რაც უზრუნველყოფს კეთილსინდისიერ მესამე პირთა უფლებების დაცვის შესაბამისი მექანიზმის არსებობას.  

როგორც თორნიკე ჭეიშვილმა განაცხადა, კანონპროექტის მიღებით შესრულდება MONEYVAL-ის მიერ 2020 წლის სექტემბერში გამოქვეყნებულ, საქართველოში ფულის გათეთრებისა და ტერორიზმის დაფინანსების წინააღმდეგ მოქმედი სისტემის მეხუთე რაუნდის შეფასების ანგარიშში მოცემული შეფასებები და რეკომენდაციები, რაც შესაძლებელს გახდის გაეროს უშიშროების საბჭოს რეზოლუციების შესრულების პროცესი მაქსიმალურად დაუახლოვდეს FATF-ის სტანდარტებს.

მსგავსი სიახლეები

ილია და დღევანდელობა

ილია და დღევანდელობა

ეკონომიკურ მეცნიერებათა დოქტორი, პროფესორი. ივ.ჯავახიშვილის სახ. თსუ-ს პ.გუგუშვილის სახ. ეკონომიკის ინსტიტუტის მთავარი მეცნიერმუშაკი. ილია ჭავჭავაძე, საქართველოს ისტორიის მეორე სვეტად წოდებული „ქართული…
2024 წლის I კვარტალში უმუშევრობის დონე შემცირდა

2024 წლის I კვარტალში უმუშევრობის დონე შემცირდა

2024 წლის I კვარტალში საქართველოში უმუშევრობის დონე წინა წლის შესაბამის პერიოდთან შედარებით 4.0 პროცენტული პუნქტით შემცირდა და 14% შეადგინა. სტატისტიკის ეროვნული…
საპენსიო სააგენტოს აქტივებმა 5 მილიარდს გადააჭარბა

საპენსიო სააგენტოს აქტივებმა 5 მილიარდს გადააჭარბა

საქართველოს საპენსიო სააგენტოს ატქივებმა დღეს 5 მილიარდ ლარს გადააჭარბა. ეს თანხა წარმოადგენს 1.3 მილიონი ადამიანის საპენსიო დანაზოგს, რაც ერთ მონაწილეზე საშუალოდ…