ვიცე-პრემიერმა, ეკონომიკისა და მდგრადი განვითარების მინისტრის განცხადებით, მთავრობას გუდაურის სხვა სეზონებზე განვითარების ხედვა აქვს. ამის შესახებ ლევან დავითაშვილმა გუდაურში 2023 – 24 წლების ზამთრის ტურისტული სეზონისადმი მოსამზადებელი სამუშაოები საჯარო უწყებებისა და ბიზნესის წარმომადგენლებთან განხილვისას განაცხადა.
ეკონომიკის სამინისტროს მიერ გავრცელებულ პრესრელიზში ამ ხედვის დამატებით დეტალებზე საუბარი არ არის და აღნიშნულია, რომ მინისტრმა გუდაურში არსებულ გამოწვევებსა და მათი დაძლევის გზებზე ისაუბრა. მისი თქმით, გუდაური მნიშვნელოვანი სამთო კურორტია, მაგრამ ამავე დროს, მთავრობას აქვს მისი განვითარების ხედვა სხვა სეზონებზეც.
ლევან დავითაშვილმა აუდიტორიას მიაწოდა ინფორმაცია მასშტაბური ინფრასტრუქტურული სამუშაოების შესახებ, რომელთაც მთავრობა სამთო კურორტის მეტი განვითარებისთვის აკეთებს. მათ შორისაა, ორი ახალი საბაგირო კომპლექსი ახალ გუდაურში, რომლებსაც ავსტრიულ – შვეიცარიული კომპანია „დოპელმაიერ – გარავენტა ჯგუფი“ ახორციელებს. თითოეული საბაგიროს გამტარუნარიანობა საათში 1800 – 2400 ადამიანი იქნება. მისი თქმით, წელს პირველად გუდაურში სნოუბორდ ქროსში საერთაშორისო დონის მსოფლიო თასის ეტაპი გაიმართება, რაც დადებითად ასახავს კურორტის ცნობადობას საერთაშორისო მასშტაბით.
შეხვედრაზე მთის ტრასების სააგენტოს დირექტორმა ირაკლი ბურჭულაძემ წარადგინა პრეზენტაცია გუდაურში 2023 – 24 წლების ზამთრის სეზონისთვის მიმდინარე და განხორციელებული სამუშაოების შესახებ. მისი თქმით, ზამთარში გუდაურში ჩამოსულ ვიზიტორებს დახვდებათ ახალი საბაგირო კომპლექსი და სასრიალო ტრასები. ასევე მოხდა არსებული ტრასების რეაბილიტაცია და განახლდა სპეცტექნიკა. ირაკლი ბურჭულაძის თქმით, კურორტი მზად იქნება, საერთაშორისო შეჯიბრებს უმასპინძლოს. „ჩვენ ამისთვის მზად ვართ. მიგვაჩნია, რომ გუდაურში მაღალი რანგის შეჯიბრებების გამართვა უმნიშვნელოვანესია, როგორც გუდაურის, როგორც სამთო კურორტის და სპორტის განვითარებისთვის, ისე საქართველოს პოპულარიზაციისთვის,“ – განაცხადა მთის ტრასების სააგენტოს ხელმძღვანელმა. შეხვედრა დისკუსიის რეჟიმში წარიმართა.
ადგილობრივი ბიზნესის წარმომადგენლებმა კურორტის განვითარების მნიშვნელოვან საკითხებზე გაამახვილეს ყურადღება. აღინიშნა, რომ შეხვედრები კერძო სექტორთან რეგულარულად გაიმართება, რათა კურორტის ზამთრის სეზონისთვის მოსამზადებელ სამუშაოებში კერძო სექტორი მაქსიმალურად იყოს ჩართული.
შეხვედრაში ასევე მონაწილეობდნენ მინისტრის მოადგილე მარიამ ქვრივიშვილი, ტურიზმის ეროვნული ადმინისტრაციის ხელმძღვანელი მაია ომიაძე, მთის ტრასების სააგენტოს დირექტორი ირაკლი ბურჭულაძე და სახელმწიფო რწმუნებული მცხეთა – მთიანეთში დავით ნოზაძე.
ლენტეხის მუნიციპალიტეტში, მდინარე ცხენისწყალზე 22 მგვტ დადგმული სიმძლავრის ჰიდროელექტროსადგურის – “ცხენისწყალი 1 ჰესის” მშენებლობა მიმდინარე წელს დაიწყება. როგორც პროექტის განმახორციელებელი კომპანიის –…
თიბისი კაპიტალმა გაცვლითი კურსის ბიზნეს-ეკონომიკის სერიიდან პირველი პუბლიკაცია გამოაქვეყნა, რომელიც ძირითადად საცხოვრებელი უძრავი ქონების სექტორში პროექტების დაფინანსების ოპტიმალური სტრუქტურის გაანგარიშებას ეხება. სხვადასხვა ქვეყნის…
2024 წლის პირველ ნახევარში საქართველოში ჩინეთიდან ავტომობილების იმპორტი გაორმაგდა – აღნიშნულ პერიოდში საქართველოში სულ $22 მილიონი დოლარის ღირებულების ავტომობილების იმპორტი განხორციელდა,…