Moody’s-მა საქართველოს საკრედიტო რეიტინგის მოლოდინი გააუმჯობესა

საერთაშორისო სარეიტინგო სააგენტო Moody’s-მა საქართველოს სუვერენული საკრედიტო რეიტინგი უცვლელად, Ba2 დონეზე დაადასტურა, თუმცა გაუმჯობესებულია საკრედიტო რეიტინგის პერსპექტივა და ის ნეგატიურის ნაცვლად სტაბილურით შეიცვალა. ორგანიზაცია წელს საქართველოში 5.5%-იან ეკონომიკურ ზრდას პროგნოზირებს.

Moody’s-მა საქართველოს სუვერენული საკრედიტო რეიტინგი ბოლოს 2022 წლის აპრილში განაახლა, რა დროსაც რეიტინგის მოლოდინი სტაბილურიდან ნეგატიურამდე შეამცირა, ეს გადაწყვეტილება რუსეთის მიერ უკრაინაში ომის დაწყების გამო, გაუარესებულ საინვესტიციო მოლოდინებს უკავშირდებოდა.

პერსპექტივის გაუმჯობესების ძირითადი მიზეზი გეოპოლიტიკური რისკებისადმი საქართველოს მოწყვლადობის უფრო დაბალ დონეზე შეფასებაა. რეიტინგის ძლიერი მხარეები მაღალი ეკონომიკური ზრდა, შოკების მიმართ ეკონომიკის მდგრადობა, ძლიერი ინსტიტუციონალური ჩარჩო, ფისკალური სტაბილურობა და ინფლაციის შემცირებაა.სააგენტოს შეფასებით, 2024 წელს საქართველოს ეკონომიკური ზრდა 5,5 პროცენტის დონეზეა მოსალოდნელი.

სააგენტოს მოლოდინით ფისკალური სტაბილურობა მომავალშიც მყარად იქნება შენარჩუნებული, რაც უზრუნველყოფს ვალის დაბალი დონისა და დაღმავალი ტენდენციის შენარჩუნებას. დადებითად არის შეფასებული ბოლო წლებში მიმდინარე ანგარიშის დეფიციტის დაღმავალი ტენდენცია და მიიჩნეულია, რომ ეს არა დროებითი, არამედ სტრუქტურული გაუმჯობესებაა, რაც ერთი მხრივ მაღალი ფისკალური დისციპლინის, ხოლო მეორე მხრივ, გატარებული რეფორმების შედეგია.