საქართველოს მეცნიერებათა ეროვნულ აკადემიაში გაიმართა დავით IV აღმაშენებლის – „მეფე აფხაზთა, ქართველთა, რანთა, კახთა, სომეხთა, შარვანშა და შაჰანშა“; „მახვილი მესიისა“ – 950 წლისთავისადმი მიძღვნილი სამეცნიერო კონფერენცია, რომლის ორგანიზატორები მეცნიერებათა აკადემიასთან ერთად, ივანე ჯავახიშვილის სახელობის თბილისის სახელმწიფო უნივერსიტეტი და საქართველოს ისტორიკოსთა ეროვნული კომიტეტი გახლდათ. ფრიად მნიშვნელოვანი სამეცნიერო ფორუმი მოხსენებით – „დავით აღმაშენებელი – კავკასიის შემკრები (გამაერთიანებელი)“ – გახსნა აკადემიკოსმა როინ მეტრეველმა. ღონისძიება დალოცა ჭიათურისა და საჩხერის მიტროპოლიტმა დანიელმა. დამსწრეთა შორის იყვნენ: საქართველოს პარლამენტის დიასპორისა და კავკასიის საკითხთა კომიტეტის თავმჯდომარე ბექა ოდიშარია, სურამისა და ხაშურის ეპარქიის ეპისკოპოსი, მეუფე სვიმეონი, საქართველოს მართლმადიდებელი ეკლესიის პროტოპრესვიტერი, თბილისის სასულიერო აკადემიისა და სემინარიის რექტორი გიორგი ზვიადაძე, საქართველოს საპატრიარქოს წმ. ანდრია პირველწოდებულის სახელობის ქართული უნივერსიტეტის რექტორი, ფილოსოფიის მეცნიერებათა დოქტორი, პროფესორი ირაკლი ბრაჭული, აკადემიის წევრები და საზოგადოების თვალსაჩინო წარმომადგენლები. საინტერესო მოხსენებებით მსმენელის წინაშე წარსდგნენ: აკადემიკოსი ჯაბა სამუშია („დავით აღმაშენებლის ეპოქის სამხედრო ხელოვნება“), პროფესორები: ბუბა კუდავა („დავით აღმაშენებელი – ნაკლული ბიოგრაფია“), მიხეილ ბახტაძე („რამდენიმე მოსაზრება ხელმეორედ მეფედ კურთხევასთან დაკავშირებით, XI-XII საუკუნეები“), სერგო ვარდოსანიძე („დავით აღმაშენებლის საეკლესიო პოლიტიკა“) და ისტორიის დოქტორი, ნუმიზმატი მაია პატარიძე („დავით აღმაშენებლის ნუმიზმატიკური მემკვიდრეობა“). აღსანიშნავია, რომ 2023 წელი საქართველოს მეცნიერებათა ეროვნული აკადემიის თაოსნობით, დიდი ქართველი პოლიტიკოსის, კავკასიის გამაერთიანებლის, წმინდა დავით IV აღმაშენებლის წლად გამოცხადდა, რაც დიდი სტიმული იქნება ქართველი საზოგადოებისთვის ამ საიუბილეო თარიღის ფართოდ აღსანიშნავად.
საქართველოში ქრისტიანობის სახელმწიფო რელიგიად გამოცხადების 1700 წლის საიუბილეო თარიღთან დაკავშირებით ეროვნული ბანკი საკოლექციო დანიშნულების ვერცხლისა და ოქროს მონეტებს გამოუშვებს. სებ-ის მიერ…
დღეიდან ქუთაისის დავით აღმაშენებლის სახელობის საერთაშორისო აეროპორტში პირველი ბიზნეს ლაუნჯი ამოქმედდა. პროექტი ეკონომიკისა და მდგრადი განვითარების სამინისტროს შპს „საქართველოს აეროპორტების გაერთიანებამ“…
საქართველოს იუსტიციის სამინისტროს ეროვნული არქივის კინოთეატრი გელა კანდელაკის იუბილესთან დაკავშირებით ფილმების რეტროსპექტივას მასპინძლობს. 4-დღიანი პროგრამა მაყურებელს რეჟისორის, პროდუსერისა და მსახიობის შემოქმედებას…