“ენგურჰესმა” 2023 წელს ოკუპირებულ აფხაზეთს უსასყიდლოდ ₾40.5 მლნ-ის ელექტროენერგია მიაწოდა

“ენგურჰესმა” 2023 წელი 6.5 მილიონი ლარის ოდენობის ზარალით დაასრულა, რაც ბოლო 3 წელიწადში ზარალის პირველი შემთხვევაა.

2022 წელს ქვეყნის ყველაზე დიდი ჰესის წმინდა მოგება 60 მლნ ლარი იყო, 2021 წელს კი 40 მლნ ლარი. ფინანსთა სამინისტროს მონაცემებით, გასულ წელს ენგურჰესის ზარალი განპირობებულია შემოსავლების შემცირებასთან ერთად, საანგარიშო პერიოდში, კურსთა შორის სხვაობით მიღებული ზარალით (7.2 მლნ ლარი) და საპროცენტო ხარჯების ზრდით. 2023 წელს წელს „ენგურჰესის“ შემოსავალმა 93 მლნ ლარი შეადგინა, რაც წლიურ ჭრილში 41%-იან კლებას აჩვენებს.

აღსანიშნავია, რომ „ენგურჰესმა“ ოკუპირებული აფხაზეთის მოსახლეობისთვის ელექტროენერგიის უსასყიდლოდ მიწოდებით 2023 წელს 40.5 მილიონი ლარის შემოსავალი დაკარგა, 2023 წელს აფხაზეთის ტერიტორიაზე ჯამში მიწოდებულ იქნა 2.181 მლრდ კვტ.სთ ელექტროენერგია, რომ არა ეს უკანასკნელი, კომპანიის მოგება 2023 წლის ბოლოს 33.8 მილიონი ლარი იქნებოდა.

2023 წელს „ენგურჰესმა“ 3.5 მლრდ კვტ.სთ ელექტროენერგია გამოიმუშავა.