რომელ სექტორებს აფინანსებენ ბანკები – სესხების სტატისტიკა დარგების მიხედვით

საქართველოში მოქმედი კომერციული ბანკების მთლიანმა საკრედიტო პორტფელმა სექტემბერში 59 მილიარდ ლარს მიაღწია, რაც წინა თვესთან შედარებით 1.69 მილიარდი ლარით, ანუ 2.93%-ით მეტია.

სებ-ის ინფორმაციით, სექტემბერში დაკრედიტების მატება ძირითადად ეროვნულ ვალუტაში გაცემული სესხებით იყო განპირობებული, რამაც 950 მილიონი ლარი შეადგინა, ხოლო სავალუტო კრედიტების ზრდა 742 მილიონი ლარი იყო. ეროვნულ ბანკს გამოქვეყნებული აქვს ინფორმაცია უშუალოდ რომელი სექტორების მიმართულებით ხორციელდება დაკრედიტება.

სტატისტიკის მიხედვით მსხვილი, საშუალო და მცირე ბიზნესის დაკრედიტება 35 მილიარდ ლარს აჭარბებს, ხოლო საცალო (ფიზიკური პირების) დაკრედიტება კი 24 მილიარდ ლარს აღემატება. ბიზნესის მიმართულებით ყველაზე მეტი 3.6 მილიარდი ლარის სესხები გაცემულია უძრავი ქონების დეველოპმენტის სექტორზე, მეორე ადგილზეა სოფლის მეურნეობა 3.2 მილიარდი ლარით, მესამეზე კი სერვისების სექტორი ასევე 3.2 მილიარდი ლარის საკრედიტო პორტფელით. რაც შეეხება საცალო სეგმენტს, აქ პირველ ადგილზე 11.2 მილიარდი ლარით სამომხმარებლო სესხებია, 8.9 მილიარდი ლარით მეორე ადგილზეა დასრულებული უძრავი ქონების შესაძენად აღებული იპოთეკური სესხები, ხოლო 1.7 მილიარდი ლარით მესამე პოზიციაზეა მშენებარე უძრავ ქონებაში ბინების საყიდლად აღებული იპოთეკური კრედიტები.