საქართველოს ეკონომიკის ამჟამინდელი ზრდის მაჩვენებელი აღსანიშნავია – EBRD
- ეკონომიკა
- ივნისი 7, 2022
- 168
საქართველოს მთავრობის ადმინისტრაციაში ინვესტორთა საბჭოს სხდომა გაიმართა, რომელსაც პრემიერი ირაკლი ღარიბაშვილი უძღვებოდა. სხდომის შესახებ საუბრობს კავკასიაში ევროპის რეკონსტრუქციისა და განვითარების ბანკის (EBRD) რეგიონული დირექტორი კატარინა ბიორლინ ჰანსენი.
ჰანსენმა სხდომის შემდეგ ანიშნა, რომ ამჟამად საქათველოში “აღსანიშნავი ეკონომიკური ზრდის მაჩვენებელია.” მისი თქმით, საგულისხმოა ის გარემოებაც, რომ უცხოური კომპანიები საქათველოში განიხილავენ ბიზნესების გახსნას.
რამდენიმე დღის წინ საქართველოს ეკონომიკური ზრდის პროგნოზი 5.5%-მდე გაზარდა მსოფლიო ბანკმა, TBC Capital-მა და Galt & Taggart-მა კი ზრდის პროგნოზი 7%-მდე გაზარდეს.
“ძალიან კარგი და დინამიური დისკუსია შედგა დღეს ინვესტორთა საბჭოს სხდომაზე. სხვადასხვა საკითხზე ვისაუბრეთ, მაგრამ მთავარი საკითხი ჩვენი დღევანდელი დღის წესრიგით ასე იყო ფორმულირებული – როგორ შეიძლება ინვესტორთა საბჭო დაეხმაროს საქართველოს ევროკავშირისკენ მიმავალ გზაზე?
მთავრობის ადმინისტრაციის მიერ გავრცელებული რელიზის თანახმად, ინვესტორთა საბჭოს წევრებმა გამოთქვეს სრული მზადყოფნა, მომავალშიც აქტიურად დაუჭირონ მხარი მთავრობის ყველა იმ ნაბიჯსა თუ რეფორმას, რომელიც ხელს შეუწყობს საქართველოს ევროკავშირთან დაახლოებას, ქვეყნისთვის ევროკავშირის წევრობის კანდიდატის სტატუსის მინიჭებას და ასოცირების შეთანხმების წარმატებით განხორციელებას. სხდომის მონაწილეთა კომენტარებს საქართველოს მთავრობის ადმინისტრაცია ავრცელებს.
