საქართველო ყველაზე მეტ ფულად გზავნილს აშშ-დან და იტალიიდან იღებს – ქვეყნების რეიტინგი

საქართველო ყველაზე მეტ ფულად გზავნილს აშშ-დან იღებს. 2025 წლის მაისში აშშ-დან გზავნილების სახით 59 მილიონი დოლარი შემოვიდა, რაც ამ ქვეყნიდან გზავნილების რეკორდული მაჩვენებელია და წინა წელთან შედარებით ის 25%-ით არის გაზრდილი, ხოლო ორი წლის წინანდელთან, ანუ 2023 წლის მაისთან შედარებით კი აშშ-დან გზავნილები 53%-ით არის გაზრდილი.

მთლიანობაში მაისში ქვეყანაში შემოსული ფულადი გზავნილების ნაკადების მოცულობამ 317.42 მლნ აშშ დოლარი (870.5 მლნ ლარი) შეადგინა, რაც 11.6%-ით (33.1 მლნ აშშ დოლარით) მეტია 2024 წლის მაისის ანალოგიურ მაჩვენებელზე.

ეროვნული ბანკის თანახმად, გზავნილებში პირველ ადგილს აშშ იკავებს 59 მილიონი დოლარით, საიდანაც გზავნილები წლიურად 25%-ით გაიზარდა. მეორე ადგილზეა იტალია 53 მილიონი დოლარით, საიდანაც გზავნილების მოცულობა 10%-ით გაიზარდა, მესამეზე კი რუსეთის ფედერაცია 44 მილიონი დოლარით, საიდანაც ფულადი გზავნილების მოცულობა 9%-ით არის შემცირებული.