სახელმწიფოს 2023 წელს მოსახლეობისთვის გაზის ტარიფის სუბსიდირება ₾207 მილიონი დაუჯდა

ფინანსთა სამინისტროში აცხადებენ, რომ საქართველოს ნავთობისა და გაზის კორპორაცია მოსახლეობისთვის გაზის ტარიფის სუბსიდირების გამო კვლავ მნიშვნელოვან ზარალს განიცდის.

როგორც ფისკალური რისკების დოკუმენტშია ნათქვამი, 2023 წელს ე.წ კვაზი-ფისკალური საქმიანობის, ანუ სოციალურ სექტორში გაზის მიწოდებით კომპანიის მიუღებელმა შემოსავალმა 207 მლნ ლარი შეადგინა.

“კომპანია კვლავ მნიშვნელოვან ზარალს განიცდის სოციალური გაზის მიწოდებით. 2023 წლის განმავლობაში რეალიზებული იქნა 2 282,3 მილიონი მ 3 გაზის მოცულობა სოციალურ სექტორში, რომლის შედეგადაც მიუღებელმა შემოსავალმა შეადგინა 206.9 მილიონი ლარი.

უნდა ჩავთვალოთ, რომ კომპანიაში 2022 წელს წარმოქმნილი ლიკვიდურობის პრობლემის ერთ-ერთი უმთავრესი მიზეზი, სწორედ კვაზი-ფისკალური აქტივობების მაღალმა დონემ განაპირობა, რომლის აღმოსაფხვრელად კორპორაციამ სახელმწიფოსგან სესხის სახით მიიღო 230 მილიონი ლარი”, – ნათქვამია დოკუმენტში.

ცნობისთვის, “ნავთობისა და გაზის კორპორაციამ” მთავრობის დავალებით მოსახლეობისთვის განკუთვნილი ბუნებრივი აირის სუბსიდირება 2013 წელს დაიწყო. მაშინ სუბსიდიის დაწყებას სამომხმარებლო ტარიფის 5 თეთრით შემცირება მოყვა, მას შემდეგ კი სუბსიდიის მიზანი მოსახლეობის გაზის ტარიფის ზრდისგან დაცვა იყო.

სოციალური სექტორის სუბსიდირების გამო, GOGC-ის ფინანსური ლიკვიდობის პრობლემებიც შეექმნა, რის გამოც 2022 წელს კომპანიამ სახელმწიფოსგან 230 მილიონი ლარის მოკლევადიანი სესხი აიღო.

ცნობისთვის, ფისკალური რისკების დოკუმენტის მიხედვით, ე.წ. კვაზი ფისკალური აქტივობები ანუ სხვადასხვა მიმართულებით სუბსიდიები 3 სახელმწიფო საწარმოშია იდენტიფიცირებული – “ენგურჰესში”, “საქართველოს რკინიგზასა” და “საქართველოს გაზის და ნავთობის კორპორაციაში”.