გურჯაანში სტიქიას ებრძვიან – რა მდგომარეობაა ამ დროისთვის?

გურჯაანში სტიქიას ებრძვიან. დაიტბორა გზები, საცხოვრებელი სახლების პირველი სართულები, ეზოები, დაისეტყვა რამდენიმე სოფელი.

 გურჯაანის მუნიციპალიტეტის მერიის პრესსამსახურში განაცხადეს, რომ უხვმა ნალექმა მდინარეების – ახტალისხევის და ნავთისხევის ადიდება გამოიწვია. წყალმა კალაპოტი გაარღვია. ცენტრალურ – თავისუფლებისა და წმინდა ნინოს ქუჩებზე კი წყალი მოედინება.

მუნიციპალიტეტის მერიის პრესსამსახურში ამბობენ, რომ ამ ეტაპისთვის ადგილზე მობილიზებულია მუნიციპალური და სამაშველო სამსახურები. მათივე ცნობით, ამ ეტაპისთვის წვიმამ გადაიღო, წყლის დონემ კი ნელ-ნელა კლება დაიწყო.

სტიქიამ მუნიციპალიტეტის რამდენიმე სოფელსაც მიაყენა ზიანი სეტყვამ ვენახები და ხეხილის ბაღები გაანადგურა.

უსაფრთხოების ზომებიდან გამომდინარე მოსახლეობას არ მიეწოდება ელექტროენერგია და ბუნებრივი აირი.