ბირჟაზე ხორბლის ფასი გაიზარდა – მიზეზი რუსეთის გადაწყვეტილებაა

საერთაშორისო სასაქონლო ბირჟაზე ხორბლის ფასი მკვეთრად იზრდება. ერთდღიან პერიოდში ბუშელი ხორბლის ღირებულებამ 2.5%-ით მოიმატა და 6.77 დოლარი შეადგინა.

ერთკვირიან პერიოდში ხორბლის გაძვირების მაჩვენებელი 5%-ს აღწევს, რაც პირდაპირ კავშირშია რუსეთის ფედერაციის გადაწყვეტილებასთან. მოგეხსენებათ, მოსკოვმა უკრაინიდან მარცვლეულის ექსპორტის შეთანხმება შეაჩერა. კრემლის განცხადებით, გაეროს შუამავლობით მიღწეული შეთანხმება იქამდე არ გახანგრძლივდება, სანამ რუსეთის მოთხოვნები არ დაკმაყოფილდება.

მარცვლეულის ექსპორტის შეთანხმებას კრიტიკული მნიშვნელობა აქვს გლობალურ სასურსათო ჯაჭვზე, რადგან უკრაინა სოფლის მეურნეობის პროდუქციის უმსხვილესი ექსპორტიორია.

კრემლის სპიკერის, დმიტრი პესკოვის განცხადებით, რუსეთი შეთანხმებას მას შემდეგ დაუბრუნდება, როდესაც დასავლეთი მის მოთხოვნებს დააკმაყოფილებს. ამ მოთხოვნებს შორისაა: ზოგიერთი რუსული ბანკის SWIFT-ის სისტემაში დაბრუნება, სანქციების შემსუბუქება და რუსეთზე დაწესებული ეკონომიკური ბლოკადის მოხსნა.