ინფორმაცია, რომ პოლიცია და საგამოძიებო შესულია რამდენიმე სააგენტოში, სიმართლეს არ შეესაბამება – ასოციაცია

„საქართველოს შემოქმედებითი ინდუსტრიის ასოციაციის“ (ACAG) განცხადებით, სიმართლეს არ შეესებამება ინფორმაცია, რომ პოლიცია და საგამოძიებო სამსახური რამდენიმე სარეკლამო სააგენტოს ამოწმებს.

ასოციაციაში აღნიშნავენ, რომ გასული წლების მსგავსად, საკომუნიკაციო სააგენტოების ნაწილმა მიიღო შეტყობინება სახელმწიფო აუდიტის სამსახურისგან.

“ინფორმაცია იმის შესახებ, რომ პოლიცია და საგამოძიებო სამსახური შესულია რამდენიმე სააგენტოში სიმართლეს არ შეესაბამება. ინფორმაცია დამახინჯებულადაა გავრცელებული. მიმდინარე დღეებში, გასული წლების მსგავსად, საკომუნიკაციო სააგენტოების ნაწილმა ნამდვილად მიიღო შეტყობინება სახელმწიფო აუდიტის სამსახურისგან. გთხოვთ აუცილებლად გადაამოწმოთ ინფორმაცია გავრცელებამდე. თითოეული სააგენტო ინფორმირებულია და სურვილის შემთხვევაში გააკეთებს დამატებით განცხადებას”,- აღნიშნულია განცხადებაში.

განახლება 19:28 საათი

საქართველოს შემოქმედებითი ინდუსტრიის ასოციაციამ Facebook-გვერდზე ინფორმაციის გავრცელების შემდეგ, პოსტი დააკორექტირა. ასოციაციის განცხადებაში ვკითხულობთ:

“ინფორმაცია იმის შესახებ, რომ პოლიცია და საგამოძიებო სამსახური შესულია რამდენიმე სააგენტოში სიმართლეს არ შეესაბამება. ინფორმაცია დამახინჯებულადაა გავრცელებული. გთხოვთ აუცილებლად გადაამოწმოთ ინფორმაცია გავრცელებამდე. თითოეული სააგენტო ინფორმირებულია და სურვილის შემთხვევაში გააკეთებს დამატებით განცხადებას”.

ცნობისთვის, გავრცელდა ინფორმაცია, რომ “რუსული კანონის” მოწინააღმდეგე პირების კომპანიებში: მეტაში, ოგილვიში, ედ ბლექ სიში, ვოთერგანზში საგადასახადო სამსახური შემოწმებას გეგმავდა.

ამასთან, შინაგან საქმეთა სამინისტროს მიერ გავრცელებული განცხადების მიხედვით, “ლიმონის” დამფუძნებელი გიორგი ოკმელაშვილი აქციაზე სამართალდამცველზე ძალადობისთვისაა დაკავებული.

bm.ge