2012 წლის შემდეგ საქართველოში ბიზნესის რეკეტი შეწყდა – ირაკლი კობახიძე
- ეკონომიკა
- სექტემბერი 13, 2024
- 257
საქართველოს პრემიერ-მინისტრი ირაკლი კობახიძე აცხადებს, რომ 2012 წლის შემდეგ საქართველოში ბიზნესის რეკეტი შეწყდა. ასე უპასუხა კობახიძემ TV პირველის ჟურნალისტის კითხვას, რომელიც ბიზნესმენ გიორგი ჩიკვაიძის მიერ გაკეთებულ განცხადებებს შეეხებოდა.
ჩიკვაიძის თქმით, ბიძინა ივანიშვილის ძმის, ალექსანდრე ივანიშვილის მოგზავნილი კაცი ნარკოტიკებს და ფულის გათეთრებას სთავაზობდა. ჩიკვაიძე, რომელიც 12 წლის განმავლობაში, ივანიშვილის გუნდის მხარდამჭერი იყო, ამტკიცებს, რომ მისი ტერორი მას შემდეგ დაიწყო, რაც 2022 წელს ანტისახელმწიფოებრივ დავალებაზე უარი თქვა. ბიზნესმენმა განცხადებები TV პირველის გადაცემა „რეაქციაში“ გააკეთა.
„ბიზნეს-რეკეტი იყო სისტემური 2012 წლამდე და 2012 წლიდან შეწყდა. რაც შეეხება ასეთი ტიპის წინასაარჩევნო შოუებს, ჩვენ გვახსოვს ასეთი ტიპის შოუები არაერთხელ. როცა ტარდებოდა არჩევნები, მაინცდამაინც არჩევნების წინ გამოდიოდნენ ადამიანები და ასეთ რაღაცებს ამბობდნენ ყოველგვარი მტკიცებულებების გარეშე. გახსოვთ ოქრუაშვილის ამბავი და ა.შ. თუმცა ვერცერთ ჯერზე ვერავინ ვერავითარი მტკიცებულება ვერ წარმოადგინა, რომ ასეთი რამ ხდება. ამ შემთხვევაში არის კაცი, რომელსაც თავისი პრობლემები აქვს. ამ პრობლემებს არ მინდა ჩავუღრმავდე. ეს არის მორიგი წინასაარჩევნო შოუ, რომლის მტკიცებულებაც არ არსებობს“, – ამბობს კობახიძე.
