“ნებისმიერ დროს მზად ვართ ბიზნესთან ურთიერთობისთვის” – პრემიერი

“ნებისმიერ დროს მზად ვართ ბიზნესთან ურთიერთობისთვის”, – ამის შესახებ პრემიერ-მინისტრმა, ირაკლი კობახიძემ საქართველოს ბიზნესასოციაციის კონფერენციაზე „საქართველოს ეკონომიკისა და სწრაფად მზარდი სექტორების პერსპექტივები“ ისაუბრა. პრემიერის თქმით, ეკონომიკისა და ბიზნესის განვითარება ქვეყანაში არსებული პრობლემების გადაჭრის “საუკეთესო გზაა”.

“ეკონომიკისა და ბიზნესის განვითარება საუკეთესო გზაა იმისთვის, რომ ჩვენი ეროვნული პრობლემები მოვაგვაროთ. აღმოვფხვრათ სიღარიბე, უმუშევრობა, ხელი შევუწყოთ ადამიანთა დასაქმებას… მომავალშიც, რა თქმა უნდა, მზად ვართ ასეთი კომუნიკაციისთვის, ნებისმიერ დროს მზად ვართ ბიზნესთან ურთიერთობისთვის”, – განაცხადა კობახიძემ.

პრემიერმა იმ სამ ფაქტორზეც ისაუბრა, რომლებიც, მისი თქმით, ბიზნესისა და ეკონომიკის განვითარებისთვის მთავარია. კობახიძე აცხადებს, რომ საქართველოში ბიზნესის კეთებისთვის სტაბილური გარემო კონსტიტუციის დონეზეა გარანტირებული.

“ქვეყანაში ეკონომიკისა და ბიზნესის განვითარებისთვის მთავარია სამი ფაქტორი. ეს არის, პირველ რიგში, სწორი ეკონომიკური პოლიტიკა, რაც უნდა ჰქონდეს სახელმწიფოს; მეორე, ეს არის ბიზნესის თავისუფლება; მესამე არის მშვიდობა და სტაბილურობა ქვეყანაში. სამივე ფაქტორი თანაბრად მნიშვნელოვანია, რომ ეკონომიკისა და ბიზნესის განვითარებას არ შეექმნას საფრთხე.

მთლიანობაში, ხელისუფლებას გააზრებული აქვს ლიბერალური ეკონომიკური პოლიტიკა, რაც ხელს უწყობს ბიზნესის განვითარებას. ჩვენს ქვეყანაში შექმნილია სტაბილური გარემო ეკონომიკის განვითარებისთვის და ბიზნესის კეთებისთვის. ამას ხელს უწყობს სტაბილური კანონმდებლობა, რომელიც მოქმედებს ქვეყანაში. სტაბილურობის გარანტიები ბიზნესისთვის კონსტიტუციის დონეზეა შექმნილი და, რა თქმა უნდა, ერთ-ერთი მთავარი ამოცანაა, სწორედ ასეთ სტაბილურობას, როგორც კანონმდებლობის, ისე ზოგადად გარემოსი, შევუწყოთ ხელი”, – განაცხადა ირაკლი კობახიძემ.