რუსეთი, ისრაელი, პოლონეთი და თურქეთი – ვინ ყიდულობს ბინებს ბათუმში?

Galt & Taggart-ის მონაცემებით, ბათუმში ადგილობრივი მოსახლეობის მიერ შეძენილი უძრავი ქონების წილი წლიდან წლამდე მცირდება. მოთხოვნას ბინებზე ძირითადად ოთხი ქვეყანა ქმნის, რომელთა შორის პირველ ადგილზე რუსეთი, მეორეზე ისრაელი, მესამეზე პოლონეთი, მეოთხეზე კი თურქეთია.

როგორც Galt & Taggart-ის ასოცირებულმა მკვლევარმა ზუკა თავყელიშვილმა გადაცემა „უძრავი ქონების პროსპექტში“ სტუმრობისას განაცხადა, ბოლო წლებში 12-დან 28-მდე გაიზარდა იმ ქვეყნების რაოდენობა, ვინც ბათუმის დეველოპერული ბაზრით ინტერესდება.

„ბათუმის უძრავი ქონება უფრო განსხვავებული ხასიათისაა, საინვესტიციო. ამის გამო მცირე ზომის ბინები გვაქვს წარმოდგენილი, რაც ნიშნავს რომ თბილისთან შედარებით საშუალო ღირებულებაც მცირეა. უცხო ქვეყნის მოქალაქეების წილი 60-70%-ია, თბილისში 85% კი ადგილობრივია.

ჩვენი გამოკითხვებით, რომელიც სისტემური დეველოპერების მონაცემებს ეფუძნება წლიდან წლამდე ადგილობრივი მოსახლების წილი უძრავი ქონების გაყიდვებში იკლებს.

2020-დან 2024 წლამდე გაყიდვებში ვნახავთ, რომ რუსეთის მოქალაქეები წარმოადგენს მეოთხედს მთლიანი გაყიდვებში, რასაც მოსდევს ისრაელი, პოლონეთი და თურქეთი, ეს არის უცხო ქვეყნის მოქალაქეების გაყიდვების ნახევარი.

გაზრდილია მრავალფეროვნება. თუ 2020 წელს 12 სხვადასხვა ქვეყნის მოქალაქე ყიდულობდა ბათუმში უძრავ ქონებას, 2024 წელს ეს რიცხვი 28 იყო. დივერსიფიკაცია აჯანსაღებს გარემოს.

მათი ინტერესის საფუძველი ორია, პირველი ფასი და მეორე ამონაგები.

2022-2023 წწ-ში ბათუმში ფასები თბილისზე მეტად გაიზარდა და 2024 წლის ბოლოს 1 470$ იყო კვ.მ-ზე, თუმცა ამის მიუხედავად თუ შევადარებთ მას სხვა საზღვაო ქალაქებს, ვნახავთ, რომ 4-ჯერ და 5-ჯერ იაფია აღმოსავლეთ თუ დასავლეთის ქვეყნებთან შედარებით. მაგ. ბათუმში თუ საშუალო ბინას 60000$-ად იყიდი, დუბაიში იგივე ფართის ბინის შესაძენად 250 000$-ია საჭირო. ამონაგებს თუ შევხედავთ, ბათუმი ლიდერობს აქ პოზიციით. 8.8%-ია საშუალო წლიური ამონაგები, რაც შესადარ ქალაქებთან მიმზიდველად გამოიყურება.

როდესაც საქართველომ კანდიდატი ქვეყნის სტატუსი მიიღო, ამან გააჩინა მოლოდინები, რომ გაწევრიანების პროცესი ეკონომიკას და ამ ბაზარსაც გაზრდიდა, ეს მოლოდინები ამ ეტაპზე მინელებულია. თუ შენელდა მოთხოვნა, მიუხედავად იმისა, რომ დეველოპერების ფასის კლების რესურსი არ აქვთ, შესაძლოა ეს მაინც ვიხილოთ ფასთან კორელაციაში.“ – განაცხადა თავყელიშვილმა.