“ნენსკრა ჰიდრომ” 2023 წელი ₾16 მილიონიანი ზარალით დაასრულა

სს „ნენსკრა ჰიდრომ“ 2023 წლის ფინანსური ანგარიშგება გამოაქვეყნა, რომელშიც ასახულია კომპანიის მიმდინარე ფინანსური მდგომარეობა, გამოწვევები და სამომავლო გეგმები.

ფინანსური შედეგები

2023 წლის მდგომარეობით, კომპანიის მთლიანი აქტივები 55.18 მილიონ ლარს შეადგენდა, რაც 2022 წლის მაჩვენებელთან შედარებით შემცირებულია 3 მილიონი ლარით. კაპიტალის მოცულობამ 54.42 მილიონი ლარი შეადგინა, მაშინ როდესაც 2022 წელს ეს მაჩვენებელი 55.29 მილიონი იყო. კომპანიამ 2023 წელს 15.96 მილიონი ლარის ზარალი განიცადა, რაც მნიშვნელოვნად დაბალია 2022 წლის 399.32 მილიონიან ზარალთან შედარებით. თავის მხრივ, 2022 წელს ზარალი განპირობებული იყო იმით, რომ მთავრობამ კომპანიას ელექტროენერგიის ტარიფი, რაც აშენებულმა ჰესმა უნდა მიიღოს 13%-ით შეუმცირა.

მთავარი გამოწვევები და პროექტის შეფერხება

„ნენსკრა ჰიდრო“ აგრძელებს ნენსკრას ჰიდროელექტროსადგურის განვითარების პროცესს, თუმცა პროექტი კვლავ სერიოზული დაბრკოლებების წინაშეა. კომპანიის მიერ 2023 წელს ჩატარებული ახალი ტენდერი გენერალური კონტრაქტორის შესარჩევად წარუმატებელი აღმოჩნდა, რის გამოც ტენდერი ნოემბერში გაუქმდა.

ამასთანავე, საქართველოს მთავრობასთან იმპლემენტაციის ხელშეკრულების განახლების პროცესში, მხარეებს შორის უთანხმოება წარმოიქმნა ელექტროენერგიის ტარიფთან დაკავშირებით. მთავრობა კომპანიისგან ტარიფის 13%-ით შემცირებას ითხოვდა, რაც პროექტის მოგებიანობაზე უარყოფითად აისახა და საბოლოოდ, აქტივების გაუფასურების ერთ-ერთი მთავარი ფაქტორი გახდა.

სამართლებრივი დავა და ფინანსური რისკები

კომპანიას ასევე აქვს სამართლებრივი დავა შპს „ქართულ სამშენებლო კონსორციუმთან“, რაც ართულებს პროექტის განხორციელებას. 2023 წლის 8 სექტემბერს საერთაშორისო სავაჭრო პალატის არბიტრაჟმა გადაწყვეტილება „ნენსკრა ჰიდროს“ სასარგებლოდ გამოიტანა, თუმცა სასამართლო პროცესები ჯერ კიდევ მიმდინარეობს.

გარდა ამისა, კომპანიის ფინანსური მენეჯმენტის მიმართულებით მნიშვნელოვანი დარღვევებიც გამოვლინდა – 2023 წლის იანვარში, კომპანიის ადმინისტრაციისა და ფინანსების უფროსმა 1.6 მილიონი ლარი მიითვისა. თუმცა, სამართალდამცავებმა ის დააკავეს და თბილისის საქალაქო სასამართლომ 8 წლით პატიმრობა მიუსაჯა.

სამომავლო პერსპექტივები

კომპანია კვლავ ცდილობს ახალი გენერალური კონტრაქტორის მოძიებას და იმედოვნებს, რომ სამშენებლო სამუშაოებს განაახლებს. ასევე მიმდინარეობს მოლაპარაკებები საერთაშორისო საფინანსო ინსტიტუტებთან პროექტის დაფინანსების განახლების თაობაზე.

მიუხედავად არსებული გამოწვევებისა, კომპანიის უმრავლესობის მფლობელმა, კორეულმა K-water-მა, მხარდაჭერა გამოხატა და დაადასტურა, რომ საჭიროების შემთხვევაში „ნენსკრა ჰიდროს“ დამატებით ფინანსურ რესურსებსაც გამოუყოფს.