ინფრასტრუქტურის სამინისტრომ გზების მშენებლობა-რეაბილიტაციის ₾100-მილიონიანი ტენდერი გამოაცხადა

ინფრასტრუქტურის სამინისტროს დაქვემდებარებაში არსებულმა საავტომობილო გზების დეპარტამენტმა გამოაცხადა 50-50 მილიონი ლარის ღირებულების ორი ტენდერი (ჯამში 100 მილიონი ლარი), რომელიც აღმოსავლეთ და დასავლეთ საქართველოში გზების მშენებლობა-რეაბილიტაციის სამუშაოებს შეეხება.

სატენდერო აღწერაში არ არის მითითებული თუ უშუალოდ რომელი საგზაო პროექტების განხორციელება არის დაგეგმილი ამ შესყიდვით, თუმცა აღნიშნულია რომ შერჩეულმა კონტრაქტორმა დავალების შემთხვევაში შესაბამისი სამუშაოები უნდა ჩაატაროს.

მსგავსი ტიპით გაფორმებული ტენდერის დროს წინასწარ განსაზღვრულია რომ იმ შემთხვევაში თუ კონკრეტულ არეალში (აღმოსავლეთ ან დასავლეთ საქართველოში) გამოიკვეთება რომელიმე საგზაო პროექტის ან რეაბილიტაციის განხორციელების აუცილებლობა, მას კონკრეტული კომპანია შეასრულებს.

ტენდერებში მონაწილეობის მიღება კომპანიებს 22 ოქტომბრის ჩათვლით შეეძლებათ.

“პრეტენდენტს, სატენდერო დოკუმენტაციით განსაზღვრულ საანგარიშო პერიოდსა და გამოცდილების არეალში, დასრულებული უნდა ჰქონდეს ანალოგიური ტიპის, ხასიათის, სირთულის და შინაარსის სამუშაოები ღირებულებით არანაკლებ წინამდებარე ტენდერის შესყიდვის ობიექტის სახელშეკრულებო ღირებულების 80%-ის ოდენობისა, მათ შორის ერთი შესრულებული ხელშეკრულების ფარგლებში დასრულებული უნდა ჰქონდეს ანალოგიური ტიპის, ხასიათის, სირთულის და შინაარსის სამუშაოები ღირებულებით წინამდებარე ტენდერის შესყიდვის ობიექტის სახელშეკრულებო ღირებულების არანაკლებ 20%-ისა,”- ნათქვამია სატენდერო დოკუმენტაციაში.