2025 წელს საქართველოს ეკონომიკა 7.5%-ით გაიზარდა – საქსტატი

საქსტატის წინასწარი შეფასებით, 2025 წლის დეკემბერში წინა წლის შესაბამის პერიოდთან შედარებით, რეალური მთლიანი შიდა პროდუქტის (მშპ) ზრდამ 7.2% შეადგინა, ხოლო 2025 წლის საშუალო რეალური ზრდა 7.5%-ით განისაზღვრა.

2025 წლის დეკემბერში, წინა წლის შესაბამის პერიოდთან შედარებით, ზრდის მიმართულებით მნიშვნელოვანი წვლილი შეიტანა შემდეგმა დარგებმა: დამმუშავებელი მრეწველობა, ინფორმაცია და კომუნიკაცია, ტრანსპორტი და დასაწყობება, სასტუმროები და რესტორნები.

კლების ტენდენცია დაფიქსირდა მშენებლობის სექტორში.

საქსტატის მონაცემებით, ეკონომიკური ზრდის წინასწარი შეფასებისას გამოყენებული დღგ-ის გადამხდელ საწარმოთა ბრუნვა დეკემბერში 18.3 მლრდ ლარი იყო, რაც წლის ჭრილში 11%-იანი ზრდაა. ამასთან, დეკემბერში 6 134 ახალი საწარმო დარეგისტრირდა, რაც 2024 წლის დეკემბრის მაჩვენებელზე 1.2%-ით მეტია.