მეტროსადგური ვარკეთილი 16 მარტიდან სრული გრაფიკით იმუშავებს

მეტროსადგური „ვარკეთილი“ 16 მარტიდან მგზავრებს კვლავ ჩვეულ რეჟიმში, 06:00-დან 00:00 საათამდე მოემსახურება. მიუხედავად იმისა, რომ სადგური სრულად იხსნება, სარეაბილიტაციო სამუშაოები ჯერ არ დასრულებულა.

თბილისის მერიის განმარტებით, სამუშაოების ძირითადი ნაწილი დასრულებულია, რის გამოც უქმდება დროებითი ავტობუსი N174, რომელიც მგზავრებს მეტროსადგურ „სამგორამდე“ გადაჰყავდა.

ამ ეტაპზე სამუშაოების დიდი ნაწილი ქვედა ბაქანზე ჩატარდა. თბილისის სატრანსპორტო კომპანიის ცნობით, დასრულდა ქვედა ბაქნისა და დახრილი საესკალატორო გვირაბის მოსაპირკეთებელი სამუშაოები, დამუშავდა ჭერის კოროზირებული ზედაპირები და შეივსო სიცარიელეები სპეციალური ხსნარებით, რათა თავიდან აიცილონ წყლის ჟონვა.

თუმცა, რეაბილიტაცია ამით არ დასრულებულა. ზედა ვესტიბიულის დაზიანებული კონსტრუქციების (მზიდი რკინაბეტონის რიგელების) გამაგრება ჯერ კიდევ წინ არის. ამჟამად მხოლოდ პროექტის მომზადება მიმდინარეობს, რის შემდეგაც უშუალოდ სამუშაოები დაიწყება.

მერიის გეგმით, მეტროსადგურის სრული რეაბილიტაცია მხოლოდ მიმდინარე წლის ზაფხულში უნდა დასრულდეს.