EBRD-ის პრეზიდენტი საქმიანი ვიზიტით საქართველოს ეწვევა

ევროპის რეკონსტრუქციისა და განვითარების ბანკის (EBRD) ახლად დანიშნული პრეზიდენტი ოდილ რენო-ბასო 12-16 სექტემბერს კავკასიის ტურნეს გამართავს, რომლის ფარგლებშიც ის საქმიანი ვიზიტით საქართველოს, აზერბაიჯანსა და სომხეთს ეწვევა.

აღსანიშნავია, რომ 2020 წელს ბანკის ხელმძღვანელის თანამდებობაზე დანიშვნის შემდეგ, ეს რენო-ბასოს პირველი საქმიანი შეხვედრაა კავკასიაში.

„მოუთმენლად ველი კავკასიაში ვიზიტს, სადაც ბოლო 30 წლის განმავლობაში EBRD-ს შესანიშნავი შედეგები აქვს მიღწეული“, – განაცხადა რენო-ბასომ.

ვიზიტის ფარგლებში რეკონსტრუქციისა და განვითარების ბანკის პრეზიდენტი მთავრობის წევრებს, პოლიტიკურ ლიდერებს, დიპლომატებს, ბიზნესისა და საბანკო-საფინანსო ინსტიტუტების წარმომადგენლებს შეხვდება.

განსახილველ თემებს შორისაა: განახლებადი ენერგია, ინფრასტრუქტურული განვითარება, რეფორმები და ფინანსური მდგრადობა.  

აღსანიშნავია, რომ 1992 წლის შემდეგ, EBRD-მა კავკასიის რეგიონში 10.6 მილიარდი ევროს ღირებულების 652 პროექტი განახორციელა. რაც შეეხება საქართველოს, გასული 30 წლის განმავლობაში EBRD-ს აქ 270 პროექტში 5 მილიარდი ევროს მოცულობის ინვესტიცია აქვს განხორციელებული.