OAST – პლატფორმა სოციალურად დაუცველ ბავშვებს უფასო განათლებას სთავაზობს
- განათლებასაზოგადოება
- ოქტომბერი 5, 2023
- 522
მეცნიერებისა და ტექნოლოგიების ონლაინ აკადემია OAST ქართულ საგანმანათლებლო ბაზარზე ახლახანს გამოჩნდა. როგორც მისი დამფუძნებელი გიორგი მეშველიანი BMG-სთან საუბრისას აღნიშნავს, მათი მთავარი მიზანი სოციალურად დაუცველი ბავშვებისთვის უფასო განათლების მიღების შესაძლებლობის მიცემაა, თუმცა, ცხადია, რომ პლატფორმა სხვა ადამიანებისთვისაც ხელმისაწვდომია – ყველასთვის, ვისაც განათლების მიღება ონლაინ სურს.
პლატფორმა ვებ-პროგრამირების, ფიზიკისა და მათემატიკის ონლაინ კურსებს აერთიანებს, ხოლო რაც შეეხება მის სიხშირეს, როგორც აკადემიაში ამბობენ, თითოეული კურსი კვირაში ორჯერ ჩატარდება.
“გამომდინარე იქიდან, რომ რეგიონებში ტექნიკური საგნების მიმართულებით კვალიფიციური კადრების დეფიციტია, ჩვენი მიზანია, რომ მოსწავლეებს შესაძლებლობა მივცეთ, ქვეყნის ნებისმიერი წერტილიდან ტექნოლოგიური განათლება მიიღონ. ჩვენი საგანმანათლებლო პროგრამა გათვლილია მხოლოდ მოსწავლეებზე, რაც მათ საშუალებას მისცემს ნაკლებად სტრესულ გარემოში და შესაბამის პერიოდში შეძლონ ცოდნის ათვისება და რეალიზება.
პლატფორმა ძირითადად ონლაინ სახისაა, ამავდროულად მოწვეულ ლექტორებსაც ვმასპინძლობთ და ეტაპობრივად, ბანაკების სახით, ჩვენი მოსაწვლეების ფიზიკურ სივრცეში გაერთიანებას და მათთვის სოციალიზაციის სივრცის შექმნასაც ვგეგმავთ”, – ამბობს გიორგი მეშველიანი.
აკადემიაში მოსწავლეების მიღება ახალახანს დაიწყო და 2023 წლის ოქტომბრამდე გაგრძელდება. აღსანიშნავია, რომ შექმნილი გრაფიკიდან გამომდინარე მათ 300-მდე მოსწავლის მიღების რესურსი აქვთ, ხოლო დიდი მოთხოვნის შემთხვევაში ახალი ნაკადების მიღების შესაძლებლობაც არსებობს.
რაც შეეხება დასაქმებულ კადრებს, აკადემია ამჟამად შვიდ სპეციალისტს ასაქმებს, რომელთაგანაც სამი პროგრამისტია, ორი ფიზიკოსი, ორიც კი მათემატიკოსი. საერთო ჯამში, გუნდის ყველა წევრის მიზანი თავიანთი კურსდამთავრებულების დასაქმებაა.
“ჩვენი მიზანია რომ აკადემიის კურსდამთავრებულები მაქსიმალურად მზად იყვნენ ლოკალურ თუ საერთაშორისო კომპანიების ბუთქემფებში მოსახვედრად, ასევე შეეძლოთ თავიანთი იდეების განხორციელება და განვითარება. წარმატებულ კურსდამთავრებულებს საშუალება ექნებათ ჩაერთნონ მათი მენტორების პირად რეალურ პროექტებშიც, როგორც უმცროსი დეველოპერები”, – ამბობს აკადემიის დამფუძნებელი.
