აშშ-საქართველოს ვაჭრობამ ისტორიულ $2 მლრდ-ს მიაღწია… ჩემთვის ეს საკმარისი არაა – ელჩი

ამერიკის შეერთებული შტატების ელჩი საქართველოში რობინ დანიგანი, გასულ წელს, აშშ-საქართველოს შორის რეკორდულად გაზრდილ სავაჭრო ბრუნვას, საკმარისად არ მიიჩნევს. ამერიკელი დიპლომატი აცხადებს, რომ ქვეყნებს შორის სავაჭრო-ეკონომიკური ურთიერთობები იმაზე მეტი იქნება, ვიდრე ოდესმე. საკითხზე დანიგანმა საქართველოს პარლამენტის საგარეო ურთიერთობათა კომიტეტის სხდომაზე გამოსვლისას ისაუბრა.

მისი თქმით, ამერიკის მთავრობა მხარს უჭერს ქართულ კომპანიებსა და ინდუსტრიებს, რათა ორ ქვეყანას შორის სავაჭრო-ეკონომიკური ურთიერთობა კიდევ უფრო გაღრმავდეს.

„ზოგიერთმა თქვენგანმა შეიძლება იცით, რომ მე ეკონომიკის სფეროშიც ვმუშაობდი და ათწლეულების განმავლობაში ვცდილობდი ურთიერთობები ამ სფეროში გამემყარებინა. გასულ წელს, ჩვენმა ვაჭრობამ ისტორიულ $2 მილიარდს მიაღწია. ჩემთვის ეს არ არის საკმარისი. პროგრამების მთელი სპექტრია, რომლითაც ჩვენ მხარს ვუჭერთ კერძო და საჯარო პარტნიორობას. მაგალითად, ივნისში შტატებში სხვადასხვა კომპანიის ინდუსტრიის წარმომადგენლებს წავიყვანთ, რითაც მხარს დავუჭერთ მათ მონაწილეობას საინვესტიციო კონფერენციაში. შემიძლია გითხრათ, რომ ჩვენს ქვეყნებს შორის სავაჭრო-ეკონომიკური ურთიერთობა უფრო მეტი იქნება, ვიდრე ოდესმე იყო“, – განაცხადა რობინ დანიგანმა.

რა გეგმა აქვს მთავრობას აშშ-თან ურთიერთობის გაღრმავების კუთხით? – ლევან დავითაშვილის პასუხი

ცნობისთვის, ოფიციალური სტატისტიკის მიხედვით, 2023 წელს საქართველო-ამერიკის შეერთებული შტატების სავაჭრო ბრუნვამ 2 მილიარდ 046 მილიონი დოლარი შეადგინა, რაც აშშ-სთან ვაჭრობის ისტორიაში რეკორდული მაჩვენებელია. შესაბამისად, ამერიკასთან ექსპორტ-იმპორტი 2023 წელს ჯამურად 60.1%-ით გაიზარდა. უნდა აღინიშნოს, რომ ამერიკასთან მთავარი სავაჭრო საქონელი, რამაც გასულ წელს ბრუნვის მნიშვნელოვანი ზრდა გამოიწვია მსუბუქი ავტომობილებია. სავაჭრო პარტნიორობის დიდი ნაწილი – 95.2% იმპორტზე მოდის. გასულ წელს ამერიკიდან საქართველომ 1 მილიარდ 949 ათასი დოლარის ღირებულების საქონელი შეიძინა, რაც 2022 წლის იმპორტს 92.5%-ით აღემატება.