კონტეინერების საერთაშორისო გადაზიდვის ხარჯები მცირდება

პანდემიის დაწყებისა და მიწოდების ჯაჭვების შეზღუდვის შემდეგ, მსოფლიოს მასშტაბით ტვირთის გადაზიდვის ხარჯები რეკორდულად გაიზარდა და 2021 წლის სექტემბერში კონტეინერით სარგებლობის საფასურმა 11,000-დოლარიან ნიშნულს გადააჭარბა.

ამჟამად საერთაშორისო ბაზარზე გადაზიდვის ღირებულების შემცირების ტენდენცია ფიქსირდება, რომელიც უკვე რამდენიმე თვეა გრძელდება.

ბოლო მონაცემებით, გადაზიდვის გლობალური ინდექსი დამატებით 2%-ით შემცირდა და კონტეინერის გამოყენების საფასურმა 2,200 დოლარი შეადგინა, რაც 2020 წლის ოქტომბრის შემდეგ დაფიქსირებული ყველაზე დაბალი მაჩვენებელია.

გადაზიდვის ხარჯების შემცირებას, სავარაუდოდ, პირდაპირ გავლენა ექნება პროდუქციის ფასებზე, განსაკუთრებით კი იმ სექტორებში, სადაც განსაკუთრებით მაღალია აზიიდან იმპორტირებული საქონლის მოცულობა.

რაც შეეხება უშუალოდ ინდექსის ვარდნას, ის მსოფლიოს მასშტაბით კოვიდ-რეგულაციების შემსუბუქებასთან, ჩინეთში საწარმოო პროცესის აღდგენასთან და გლობალური სავაჭრო მარშრუტების დასტაბილურებასთანაა დაკავშირებული. აგრეთვე გასათვალისწინებელია საწვავის გაიაფება, რომელსაც პირდაპირი გავლენა აქვს ტრანსპორტირების ხარჯებზე.