რუსეთის საზღვართან ახალი გზის აშენების ტენდერი ხელახლა გამოცხადდა – კილომეტრი 50 მლნ ჯდება

დარიალზე, რუსეთის საზღვართან ახალი გზის აშენებისთვის 225 მილიონი ლარის ღირებულების ტენდერი გამოცხადდა. შესაბამისად, ერთი კილომეტრის გაყვანის სავარაუდო ღირებულება 50 მილიონ ლარს შეადგენს.

საპროექტო დოკუმენტაციის თანახმად, 4.5-კილომეტრიანი გზა სტეფანწმინდიდან ზემო ლარსის მიმართულებით არსებულ მოძველებულ და რთულ საგზაო მონაკვეთს ჩაანაცვლებს. გაიზრდება გამტარიანობა და შემცირდება გადაადგილების დრო. ასევე, ახალი გზა კლიმატური პირობების მიმართ უფრო მედეგი იქნება და უხვი თოვლი მის შეფერხებებს არ გამოიწვევს.

ამ გზის მშენებლობის ტენდერი საქართველოს ინფრასტრუქტურის სამინისტრომ მეორედ გამოაცხადა, თავდაპირველად ტენდერი 2023 წლის ივნისში გამოცხადდა და მასში მონაწილეობა ხუთმა ჩინურმა სახელმწიფო კომპანიამ მიიღო, თუმცა საბოლოოდ 2024 წლის თებერვალში მიღებული გადაწყვეტილებით, გზების დეპარტამენტმა ყველა მონაწილე კომპანიას დისკვალიფიკაცია მიანიჭა.

საპროექტო დოკუმენტაციის თანახმად, გზის სიძვირეს განაპირობებს ფაქტი, რომ მისი სიგრძის 59% ესტაკადაზე, ხოლო 29% გვირაბებში გაივლის, შესაბამისად, გვირაბებსა და ესტაკადებზე საპროექტო სიგრძის 88% მოდის.

ასაშენებელი ობიექტების ჩამონათვალი ასეთია:

• ესტაკადა N1 მდ.თერგზე – სიგრძე 2018 მეტრი;
• ესტაკადა N2 – სიგრძე 636 მეტრი;
• გვირაბი N1 – სიგრძე 460 მეტრი;
• გვირაბი N2 – სიგრძე 846 მეტრი.

გზის პარამეტრები ასეთი იქნება:

• საანგარიშო საპროექტო სიჩქარე – 60 კმ/სთ;
• მიწის ვაკისის სიგანე – 14.0 მ;
• სავალი ნაწილის სიგანე – 7.0 მ;
• სამოძრაო ზოლის სიგანე – 3.5 მ;
• სამოძრაო ზოლების რაოდენობა – 2.

“საპროექტო გზის მონაკვეთი მდებარეობს მცხეთა-მთიანეთის რეგიონის, ყაზბეგის მუნიციპალიტეტის ტერიტორიის ფარგლებში. გზა გადის პრაქტიკულად დაუსახლებელ ტერიტორიაზე. საპროექტო მონაკვეთის მთლიანი სიგრძე შეადგენს 4.5 კმ-ს. სტეფანწმინდა-გველეთის მონაკვეთი არის არშა-სტეფანწმინდის შემოვლითი გზის მონაკვეთის გაგრძელება. მიმართულების გარკვეული ნაწილი მდინარე თერგის კალაპოტის მარცხენა ნაპირზე, სანაპირო ზოლში გადის. საპროექტო მონაკვეთი გადის ძალიან რთულ რელიეფში, მდინარე თერგის ვიწრო ხეობაში, რომელიც ორივე მხრიდან შემოსაზღრულია მთებით”, – ნათქვამია სატენდერო პირობებში.