ენერგეტიკა, მრეწველობა, ვაჭრობა, მშენებლობა… – სექტორები, რომლებშიც ინვესტირება შემცირდა

ენერგეტიკაში, მრეწველობაში, ვაჭრობაში, მშენებლობაში, უძრავ ქონებასა და სხვა სექტორებში უცხოური ინვესტიციები შემცირდა.

საქსტატმა დღეს პირდაპირი უცხოური ინვესტიციების ამსახველი ანგარიში გამოაქვეყნა, რომლის მიხედვითაც 2024 წლის მესამე კვარტალში FDI მთელი 55%-ით შემცირდა და მხოლოდ 198 მილიონი დოლარი შეადგინა, ცხრა თვეში კი FDI-ის მოცულობა 966 მილიონი დოლარი იყო, რაც წლიურად 40%-ით არის შემცირებული.

რაც შეეხება ეკონომიკის დარგებს, მათში ჩადებული ინვესტიციების მოცულობას, მათ შორის პირველ ადგილზეა საფინანსო სექტორი, სადაც 2024 წლის 9 თვეში 401 მილიონი დოლარი ჩაიდო, რაც წინა წელთან შედარებით 42%-ით მეტია. მეორე ადგილზეა ენერგეტიკის სექტორი, სადაც 2024 წლის 9 თვეში 150 მილიონი დოლარი ჩაიდო, თუმცა ეს თანხაც 2023 წლის ანალოგიურ პერიოდთან შედარებით 10%-ით ნაკლებია. კიდევ უფრო მეტად, 50%-ით შემცირდა FDI დამმუშავებელ მრეწველობაში, 54%-ით ვაჭრობაში, 42%-ით ტრანსპორტში, 68%-ით ინფორმაციისა და ტელეკომუნიკაციის დარგში, 94%-ით მშენებლობის სექტორში, განათლების სფეროში 20%-ით, დანარჩენ სექტორებში კი FDI 33%-ით შემცირდა.

ბიემჯი