„ეს იმ ტემპის მაქსიმუმია, რის ათვისებაც კერძო სექტორს შეუძლია“ – დავითაშვილი პრივატიზაციის პროგრამის დაჩქარებაზე

ეკონომიკის მინისტრობის კანდიდატის ლევან დავითაშვილის განცხადებით, პრივატიზების პროგრამა იმ მაქსიმალური ტემპებით მიმდინარეობს, რომლის ათვისებაც კერძო სექტორს შეუძლია. ამის შესახებ მან პარლამენტში გაერთიანებული კომიტეტების სხდომაზე გამოსვლისას დეპუტატების კითხვების საპასუხოდ განაცხადა, რომელიც სახელმწიფო ქონების პრივატიზების პროგრამის ტემპების დაჩქარებას შეეხებოდა.

ლევან დავითაშვილის ინფორმაციით, 2019-2023 წლებში სახელმწიფო ქონების პრივატიზების პროგრამით „100 ქონება ბიზნესს“ ბიზნესიდან 0.5 მლრდ ლარზე მეტის მობილიზება მოხდა, ასევე გასულ წელი ძალიან აქტიური იყო და 2 723 აუქციონი ჩატარდა და დაახლოებით 300 მლნ ლარის მობილიზება მოხდა, რაც 100%-ით მეტით შესრულდა გეგმა.

„ეს იმ ტემპის მაქსიმუმია, რომლის ათვისება ჩვენს კერძო სექტორს შეუძლია. იმ შემთხვევაში თუ ჩვენ ამ შესაძლებლობის მიღმა სახელმწიფო ქონების უპასუხისმგებლო განკარგვას მოვახდენთ, ეს ეკონომიკის ინტერესებისთვის ვერ იქნება გამოყენებული და სახელმწიფო ქონებაზე ისეთი ინვესტიციები ვერ განხორციელდება, რომელიც ეკონომიკურ ზრდას შეუწყობს ხელს.

იგივე უკავშირდება წიაღისეული რესურსების უფასოდ დარიგებას, ყველა იმ ადამიანისთვის ვისაც კონკრეტული მიწის ნაკვეთი გააჩნია. სახელმწიფო საკუთრებაში არსებული ბუნებრივი რესურსები პასუხისმგებლობით უნდა განიკარგოს. ამ რესურსზე პრეტენზიის მქონე ინვესტორს იმის შესაძლებლობა უნდა ჰქონდეს, რომ ამ რესურსს გამოიყენებს მდგრადად, სწორად, გარემოსდაცვითი პირობების გათვალისწინებით და ასევე შესაბამის ინვესტიციებს“, – განაცხადა დავითაშვილმა.