დღეს, პარლამენტში საქართველოს პრეზიდენტის იმპიჩმენტის საკითხს განიხილავენ

დღეს საქართველოს პარლამენტში პლენარულ სხდომაზე, პრეზიდენტის იმპიჩმენტის საკითხს განიხილავენ, რომელიც 12 საათზე დაიწყება.

შესაბამისი დადგენილება პარლამენტმა 17 ოქტომბერს გამართულ პლენარულ სხდომაზე მიიღო, როცა 88 ხმით 8-ის წინააღმდეგ მიიღო დადგენილება “საქართველოს პრეზიდენტის − სალომე ზურაბიშვილის იმპიჩმენტის წესით თანამდებობიდან გადაყენების საკითხის განხილვისა და კენჭისყრის ვადის განსაზღვრის თაობაზე“.

დადგენილების თანახმად, პარლამენტმა საქართველოს პრეზიდენტის − სალომე ზურაბიშვილის იმპიჩმენტის წესით თანამდებობიდან გადაყენების საკითხი საქართველოს საკონსტიტუციო სასამართლოს მიერ წარმოდგენილი საქართველოს პრეზიდენტის მიერ კონსტიტუციის დარღვევის თაობაზე დასკვნის (№3/1/1797, 16.10.2023) საფუძველზე უნდა განიხილოს და აღნიშნულ საკითხს კენჭი უყაროს 2023 წლის საშემოდგომო სესიის 17−20 ოქტომბრის პლენარული სხდომების კვირაში.

შალვა პაპუაშვილის ინფორმაციით, საქართველოს პრეზიდენტმა სალომე ზურაბიშვილმა განხილვაში მონაწილეობაზე თანხმობა განაცხადა.

საქართველოს პრეზიდენტის, სალომე ზურაბიშვილის წინააღმდეგ იმპიჩმენტის პროცედურების დაწყება ქართულმა ოცნებამ 1 სექტემბერს დააანონსა. პარტიის თავმჯდომარის, ირაკლი კობახიძის თქმით, “სალომე ზურაბიშვილმა უხეშად დაარღვია საქართველოს კონსტიტუცია და მთავრობის თანხმობის გარეშე დაიწყო ვიზიტების სერია საზღვარგარეთის ქვეყნებში”.

ქართულ ოცნებას თავიდანვე გაცხადებული ჰქონდა, რომ არსებულ პოლიტიკურ მოცემულობაში იმპიჩმენტის პროცედურის “სისრულეში მოყვანა შეუძლებელია”, თუმცა, “ნებისმიერი თვალის დახუჭვა კონსტიტუციის დარღვევაზე ძირს უთხრის სამართლებრივ სახელმწიფოს”.

კონსტიტუციის თანახმად, პრეზიდენტის იმპიჩმენტს პარლამენტის სრული შემადგენლობის 2/3-ის მხარდაჭერა ესაჭიროება, რაც 100 დეპუტატს შეადგენს.

საქართველოს პრეზიდენტის იმპიჩმენტთან დაკავშირებით, საკონსტიტუციო სასამართლოში კონსტიტუციური წარდგინების 3-დღიანი განხილვა 6 ოქტომბერს დასრულდა. 16 ოქტომბერს კი საქართველოს საკონსტიტუციო სასამართლომ პრეზიდენტი, სალომე ზურაბიშვილი კონსტიტუციის დამრღვევად ცნო. გადაწყვეტილება მერაბ ტურავამ გამოაცხადა. განსხვავებული აზრი მხოლოდ სამ მოსამართლეს – ირინე იმერლიშვილს, გიორგი კვერენჩხილაძეს და თეიმურაზ ტუღუშს ჰქონდა.