ჩვენ უნდა ამოვიდეთ ბავშვების ინტერესებიდან – ირაკლი კობახიძე დიუშენზე

პირველ რიგში, ჩვენ უნდა ამოვიდეთ ბავშვების ინტერესებიდან, იმედი გვაქვს, ერთად გამოვძებნით ამ საკითხის გადაჭრის გზებს, – ამის შესახებ საქართველოს პრემიერ-მინისტრმა, ირაკლი კობახიძემ დიუშენის კუნთოვანი დისტროფიით დაავადებული ბავშვების მშობლებთან შეხვედრასთან დაკავშირებით განაცხადა.

როგორც კობახიძემ აღნიშნა, მშობლებთან დღეს შედგა პირველი შეხვედრა, სადაც კიდევ ერთხელ გაიცვალა მოსაზრებები და ინფორმაცია სხვადასხვა საკითხთან, მათ შორის, კონკრეტულად მედიკამენტებთან დაკავშირებით.

„ეს იყო დღევანდელი შეხვედრის მიზანი. თავიდანვე, შეხვედრის დასაწყისიდანვე შევთანხმდით, რომ უახლოეს მომავალში, მაქსიმუმ, ზეგ დილამდე შედგება მეორე შეხვედრა, სადაც, იმედი გვაქვს, რომ ერთად დავსახავთ საკითხის გადაჭრის გზებს. ეს იქნება უკვე მეორე შეხვედრის მიზანი, რომელიც, მაქსიმუმ, ზეგ დილისთვის შედგება. იმედი გვაქვს, გამოიძებნება ამ საკითხისთვის ეს ერთობლივი გადაწყვეტა. ძალიან მგრძნობიარე საკითხია და, პირველ რიგში, ჩვენ უნდა ამოვიდეთ ბავშვების ინტერესებიდან. იმედი გვაქვს, ერთად გამოვძებნით ამ საკითხის გადაჭრის გზებს“, – განაცხადა ირაკლი კობახიძემ.